Tennısshi Danııl Medvedev alǵash ret Almaty týrnırinde óner kórsetedi

ASTANA. KAZINFORM – Álemniń 9-raketkasy, reseılik Danııl Medvedev Almaty qalasynda 11-19 qazanda ótetin Almaty Open ATP 250 týrnırinde baq synaıdy. 

Qazaqstan tennıs federatsııasynan málim etkenindeı, álemniń eks-birinshi raketkasy, US Open-2021 chempıony, Aýstralııa ashyq chempıonattarynyń (2021, 2022, 2024) fınalısi, 2020 jylǵy ATP qorytyndy týrnıriniń jeńimpazy, jekeleı synda 20 ATP jarysynda úzdik shyqqan, 2021 jylǵy Devıs jáne ATP kýbogynyń ıegeri D. Medvedev Almaty dodasyna alǵash ret qatysqaly otyr.

Danııl Medvedev jasóspirim kezindegi alǵashqy tıtýlyn Óskemende jeńip aldy, bul onyń kásibı tennıstegi úlken jolynyń bastaýy boldy. Al 2022 jyly Astanada ATP 500 týrnırinde óner kórsetip, jartylaı fınalǵa deıin jetti. Onda matchboldary bola tura, bolashaq chempıon Novak Djokovıchke jol berdi.

— Men Almatyda alǵash ret oınaıtynyma qýanyshtymyn. Bul — meniń tennıs jolymdaǵy jańa beles. Men qazaqstandyq jankúıerlerdiń qonaqjaılylyǵy, jyly ynta-yqylasy týraly kóp estidim. Kortta kezdeskenshe! — dedi D. Medvedev.

Eske sala keteıik, budan buryn Sandýǵash Kenjebaevanyń Qytaıdaǵy týrnırdiń fınalynda oınaıtynyn jazǵan edik.