Tennısshi Asyljan Arystanbekova Túrkııadaǵy jarysta úzdik shyqty
ASTANA. KAZINFORM — Qazaqstandyq tennısshi Asyljan Arystanbekova Antalııa (Túrkııa) ITF World Tennis W15 týrnırinde jeńimpaz atandy.
Jarystyń 1-raketkasy bolyp tirkelgen A.Arystanbekova ýkraınalyq Darıa Esıpchýkpen birge barlyǵy tórt kezdesýin jeńispen támamdady.
Qazaqstandyq-ýkraınalyq dýet fınalda rýmynııalyqtar Stefanııa Bojıka — Anastasııa Saftamen bas júldeni sarapqa saldy.
Birinshi partııany Arystanbekova — Esıpchýk 6:4 esebimen óz paıdasyna sheshti.
Ekinshi sette rýmynııalyq jup qarymta qaıyrdy — 6:3.
Sýper taı-breıkte A.Arystanbekova — D. Esıpchýk jeńisti julyp aldy — 10:8.
Osylaısha, qazaqstandyq tennısshi sporttyq jolynda eresekter arasynda 11-inshi tıtýlyna ıe boldy. Sonyń ishinde toǵyzy juptyq syndaǵy chempıondyq ataq edi.
Taǵy bir qazaqstandyq Ekaterına Dmıtrıchenko juptyq synda túrkııalyq Irem Kýrtpen birge Sharm-el-Sheıh (Mysyr) ITF W15 dodasynda top jardy. Olar fınalda reseılikter Polına Starkova — Sofııa Sýslovany qapy qaldyrdy — 6:2, 6:4.
Sóıtip, senbi kúni Jibek Qulambaevanyń Kolýmbııadaǵy jeńisin qosa eseptegende, qazaqstandyq tennısshiler juptyq synda úsh birdeı týrnırde úzdik shyqty.
Eske sala keteıik, budan buryn Jibek Qulambaevanyń Kolýmbııadaǵy týrnırdiń chempıony atanǵanyn jazǵan edik.
Sondaı-aq WTA qorytyndy týrnırinde jartylaı fınalǵa shyqqan tennısshiler anyqtaldy.
