Tennısshi Aleksandr Nedovesov ulttyq quramadaǵy mansabyn aıaqtady

ASTANA. KAZINFORM — Qazaqstannyń juptyq syndaǵy birinshi raketkasy, 37 jastaǵy Aleksandr Nedovesov ulttyq quramadaǵy mansabyn aıaqtady.

Devıs kýbogy birinshi álemdik tobynyń Qazaqstan — Pákstan arasyndaǵy pleı-off matchy kezinde A.Nedovesovti saltanatty shyǵaryp salý rásimi boldy. 
Qazaqstan tennıs federatsııasynyń vıtse-prezıdenti Dıas Dosqaraev A.Nedovesovtiń elimizde osy sport túriniń damýyna qosqan úlesi qomaqty ekendigin atap ótti.

Tennısshiniń ózi ata-anasyna, otbasyna, federatsııaǵa, komandalastaryna jáne jankúıerlerine rızashylyǵyn bildirdi.

— Aldymen meni ómir boıy qoldap kele jatqan ata-anam men otbasyma alǵysymdy aıtamyn. Men sizderdi óte jaqsy kóremin. Sondaı-aq Bolat Ótemuratov bastaǵan Qazaqstan tennıs federatsııasyna rızamyn. Men sońyma qaraǵan kezde eshteńege ókinbeıtin sátke jettim. Óz sporttyq jolymda Qazaqstan quramasy sapynda eleýli jeńisterge qol jetkizdim, ol sátter eshqashan umytylmaıdy. Maǵan senip, qoldaǵan jankúıerlerime myń alǵys, — dedi A.Nedovesov. 

Tennısshi sporttyq jolynda 2024 jyly Parıj Olımpıadasyna qatysty. Komandalyq jarysta 2014 jylǵy Azııa oıyndarynyń chempıony atandy. Al 2018 jyly Azıadada mıkste úzdik úshtikke ilikti. Sonymen qatar juptyq synda úsh márte ATP 250 týrnıriniń jeńimpazy boldy.

Qazaqstandyq sportshy ATR reıtıngisinde jekeleı synda 2014 jyly 72-inshi, al ótken jyly juptyq synda 38-orynǵa kóterildi. Bul onyń úzdik kórsetkishteri edi. 

Aleksandr Nedovesov Qazaqstan quramasy sapynda Devs kýbogynda 2014 jyly 5 sáýirde syrt alańda Shveıtsarııamen ótken shırek fınaldyq matchta alǵashqy oıynyn ótkizdi. Sol básekede Andreı Golýbevpen birge 2008 jylǵy Olımpıada chempıondary Rodjer Federer men Sten Vavrınkany utty. Devıs kýbogynda Aleksandr barlyǵy 28 báseke ótkizse, sonyń 22-si juptyq syn edi. 

Qazaqstan tennıs federatsııasynan túsken málimetke qaraǵanda, qazirgi kezde A.Nedovesov jaraqatynan emdelýde. Qazaqstan quramasyndaǵy mansabyn tolyqtaı aıaqtaǵan ol bıyl jekelegen jarystarǵa qatysýy múmkin. 

Eske sala keteıik, budan buryn tennısten Devıs kýbogynda Qazaqstannyń Pákistan quramasyn utqanyn jazǵan edik.