Tennısshi Aleksandr Býblık jeke rekordyn jańartty

ASTANA. KAZINFORM – Álemniń 16-shy raketkasy, qazaqstandyq tennısshi Aleksandr Býblık 2025 jyly ATP negizgi týrnırinde bir maýsymda 34 jeńiske jetti, bul onyń eń jaqsy nátıjesi boldy, dep habarlaıdy Sports.kz portaly.

Championat.com saıtynyń málimetinshe, Býblıktiń buǵan deıingi eń jaqsy kórsetkishi 2021 jyly 33 jeńis bolǵan.

Aleksandr Parıjdegi (Frantsııa) «Masters» týrnıriniń birinshi aınalymynda 34-shi jeńisine qol jetkizdi. Ol aýstralııalyq Alekseı Popyrındi (reıtıngide 47-orynda) 6-4, 6-3 esebimen jeńdi.

Ekinshi aınalymda Býblık Korentın Mýte (Frantsııa) men Raıllı Opelka (AQSh, LL) arasyndaǵy kezdesýdiń jeńimpazymen kezdesedi. 

Parıjdegi «Masters» týrnıriniń qazirgi jeńimpazy – germanııalyq tennısshi Aleksandr Zverev. Ótken jylǵy fınalda ol frantsýzdyq Ýgo Ýmberdi jeńgen bolatyn. 

Buǵan deıin Aleksandr Býblık Parıj masters jarysyn jeńispen bastaǵanyn jazǵan edik.