Tennıs: Jas qazaqstandyq Eýropa týrnıriniń jeńimpazy atandy
NUR-SULTAN. QazAqparat – Qazaqstandyq Zańǵar Nurlanuly jekeleı synda Norvegııa astanasy Osloda 14 jasqa deıingiler arasynda úshinshi sanattaǵy Tennis Europe týrnıriniń jeńimpazy atandy, dep habarlaıdy QazAqparat tilshisi.
Qazaqstan tennıs federatsııasy málim etkenindeı, Zańǵar juptyq synda da tabysty óner kórsetip, fınalǵa deıin jetti.
Z.Nurlanuly jekeleı synda 2 saǵat 40 mınýtta sozylǵan sońǵy básekede frantsııalyq Lene Kýtıýreni 4:6, 6:0, 6:3 esebimen tize búktirdi. Zańǵar ony bir apta buryn osy Norvegııa eliniń Bergen qalasynda utqan bolatyn.
Qazaqstandyq tennısshi jartylaı fınalda jarystyń 1-raketkasy, Frantsııanyń 14 jasqa deıingiler arasyndaǵy úzdik oıynshysy Lene Petıtany 7:5, 7:6 esebimen jeńdi. Bul oıyn da tartysty ótip, 2 saǵat 18 mınýtqa sozyldy.
Osylaısha Zańǵar Nurlanuly bıyl Tennis Europe serııasyndaǵy úsh jarystyń chempıony atanyp, taǵy ekeýinde fınalǵa deıin jetti.
Jyl sońyna deıin qazaqstandyq jas sportshy Ystanbulda ótetin dodaǵa qatysyp, bir apta demalystan keıin jańa maýsymǵa daıyndyǵyn bastaıdy.
Eske sala keteıik, budan buryn aldaǵy jyly Almaty men Túrkistanda jańa tennıs ortalyqtary ashylatynyn jazǵan bolatynbyz.
