Tennıs: Zarına Dııastyń Charlston týrnırindegi qarsylasy anyqtaldy
ASTANA. QazAqparat - Qazaqstannyń birinshi raketkasy Zarına Dııastyń Charlston (AQSh) týrnırindegi qarsylasy anyqtaldy, dep habarlaıdy QazAqparat tilshisi.
Zarına alǵashqy aınalymda dúnıejúzilik reıtıngte 91-inshi orynda turǵan amerıkalyq Krıstına Makheılmen oınaıdy. Eger ony utqan jaǵdaıda osy týrnırde úshinshi raketka bolyp tirkelgen, qazirgi kezde Reseı tennısshileriniń kóshin bastap otyrǵan Darıa Kasatkınamen kortqa shyǵady.
Qazirgi kezde Charlston týrnırinde irikteý saıystary ótýde. Negizgi týrnır erteń bastalady.
Aıta keteıik, buǵan deıin Zarına Dııas Maıamı týrnıriniń tórtinshi aınalymyna deıin jetip, onda jaraqatyna baılanysty kezdesýin jalǵastyra almaı, chehııalyq Karolına Plıshkovaǵa jol bergen bolatyn. Bul iri jarysta fınalda latvııalyq Elena Ostapenkony 7:6 (7:5), 6:1 esebimen utqan amerıkalyq Sloan Stıvens jeńimpaz atandy. Ol endi álemdik reıtıngte 9-ynshy orynǵa kóteriledi. Sonymen qatar aldaǵy dúısenbide jańartylatyn reıtıngte Zarına Dııas ta úzdik elýliktiń qataryna kiredi.
