Tennıs: Zarına Dııas - «Jyl jańalyǵynan» úmitkerlerdiń biri
ASTANA. QazAqparat - WTA resmı saıty «Jyl jańalyǵy» ataǵyna úmitkerlerdiń esimin jarııa etti.
Olardyń qatarynda shveıtsarııalyq Belında Benchıch, amerıkandyq Shelbı Rodjers, japonııalyq Kýrýmı Nara jáne qazaqstandyq Zarına Dııas bar. Osy tórteýine jankúıerler daýys beretin bolady. Daýys berý qorytyndysy 17 qarasha kúni jarııalanbaq.
2013 jyly kanadalyq Ejenı Býshar «Jyl jańalyǵy» bolyp tanylǵan edi. 2005 jyldan beri tabys etilip kele jatqan bul marapatty ár jyldary sondaı-aq, keıin álemniń úzdik raketkalary qataryna kóterilgen Agneshka Radvanska, Karolın Voznıatskı, Petra Kvıtova ıelengen bolatyn.
2014 jyl jıyrma bir jastaǵy qazaq qyzy, Almaty qalasynyń túlegi Zarına Dııas úshin asa tabysty bolǵany málim. Ásirese, ol álem birinshilikterimen teń deýge bolatyn Ýımbldon týrnırinde, Avstralııa men AQSh-tyń ashyq chempıonatynda birshama sátti óner kórsetti.
Sondaı-aq, Osaka jarysy syndy WTA týrnırinde tuńǵysh ret fınalǵa deıin jetti. Osyndaı jetistikterdiń nátıjesinde Qazaqstannyń birinshi raketkasy atanǵan Z.Dııas álemniń úzdik 34 tennısshisiniń qataryna endi. Ol osy aptada dúnıejúzilik reıtıngte taǵy bir satyǵa, 33-orynǵa kóterildi. Qazirgi tańda Zarına aldaǵy jyly budan da bıik tabystarǵa qol jetkizý úshin daıyndalýda.
