Tennıs: Zarına Dııas Japonııadaǵy týrnırdiń jartylaı fınalyna shyqty
NUR-SULTAN. QazAqparat - Qazaqstandyq tennısshi Zarına Dııas Japonııadaǵy Gıfý ITF týrnıriniń jartylaı fınalyna shyqty, dep habarlaıdy QazAqparat tilshisi.
Týrnırdiń úshinshi, álemniń 115-raketkasy Z.Dııas shırek fınalda japonııalyq, reıtıngte 168-orynda turǵan Kýrýmı Naramen sheberlik baıqasty.
Birinshi partııada kort ıesi 6:2 esebimen basym tústi.
Ekinshi set tartysty órbip, taı-breıkke deıin jetti. Onda Zarına 7:3 esebimen jeńiske jetti.
Sheshýshi, úshinshi partııada breık jasap, óz geımin alǵan qazaqstandyq tennısshi 4:1 esebimen alǵa ketti. Aqyry sol basymdylyǵynan aıyrylǵan joq - 6:2.
Zarına Dııas fınalǵa shyǵý úshin álemniń 314-raketkasy, aýstralııalyq Meddıson Inglıspen talasady.
Taǵy bir qazaqstandyq, reıtıngte 608-orynda turǵan Dmıtrıı Popko AQSh-taǵy Vero Bıch ITF týrnıriniń shırek fınalyna shyqty.
Ol aldymen kolýmbııalyq Hýan Benıtes Chavarrıagany 6:2, 7:5 esebimen tize búktirdi. Sodan keıin taǵy bir kolýmbııalyq Nıkolas Meııany tartysty matchta 6:2, 4:6, 6:3 esebimen utty.
D.Popko jartylaı fınalǵa shyǵý úshin osy jarystyń birinshi, álemniń 382-raketkasy, brazılııalyq Pedro Sakamotomen kúsh synasady.
Eske sala keteıik, budan buryn Zarına Dııastyń Japonııadaǵy jarystyń shırek fınalyna shyqqanyn, ıÝlııa Pýtıntsevanyń Rabat týrnıriniń alǵashqy aınalymynan asa almaǵanyn, taǵy bir qazaqstandyq Elena Rybakınanyń álemdik reıtıngte birden 27-orynǵa joǵarylaǵanyn jazǵan bolatynbyz.
Al erler arasynda Qazaqstannyń birinshi, álemniń 40-raketkasy Mıhaıl Kýkýshkın Eshtorıl týrnıriniń alǵashqy aınalymynan óte almaı qaldy.
