Tennıs: Zarına Dııas US Open týrnıriniń jeńimpazyn uta almady
ORAL. QazAqparat - Qazaqstandyq Zarına Dııas Beıjiń týrnıriniń birinshi aınalymynda japonııalyq Naomı Osakamen kúsh synasty, dep habarlaıdy QazAqparat tilshisi.
Búgin jańartylǵan dúnıejúzilik reıtıngte Naomı Osaka 8-den altynshy, Zarına Dııas 92-den 91-inshi orynǵa kóterilgen edi.
Bıyl N.Osaka óziniń sporttyq jolyndaǵy eń úlken tabysyna qol jetkizdi. Ol Japonııa qyzdary arasynda alǵash ret US Open týrnıriniń chempıony atandy.
Osyǵan deıin N.Osaka men Z.Dııastyń joldary «Rolan Garros» týrnırinde toqaılasyp, onda japon qyzy basym túsken edi.
Bul joly birinshi partııada esep 4:4 bolǵan mezette N.Osaka bir ǵana breık-poınttyń ózin sátti paıdalana bildi. Sosyn ózi dop bergen sátte de qatelesken joq - 6:4.
Ekinshi sette japon tennısshisi birden breık jasap, alǵa shyqqanymen, Z.Dııas qarymta qaıyryp, tarazy basyn teńestirdi. Áıtse de, budan keıin N.Osaka qarsylasyna des bermeı, esepti 5:1-ge jetkizdi. Z.Dııas esepti qysqartqanymen, odan árige shamasy jetpedi. Bul partııany da N.Osaka jeńispen aıaqtady - 6:3.
Match 1 saǵat 9 mınýtqa sozyldy.
Japon tennısshisi ekinshi aınalymda álemniń 37-inshi raketkasy, amerıkalyq Danıel Kollınzben kezdesedi.
Eske sala keteıik, budan buryn taǵy bir qazaqstandyq tennısshi ıÝlııa Pýtıntsevanyń júlde qory 8,2 mln AQSh dollarynan asatyn Beıjiń týrnıriniń alǵashqy aınalymynan asa almaǵanyn jazǵan bolatynbyz.
