Tennıs: Zarına Dııas US Open týrnıriniń alǵashqy aınalymynan óte almady
ASTANA. QazAqparat - Qazaqstandyq tennısshi Zarına Dııas US Open týrnıriniń alǵashqy aınalymynda álemniń 8-inshi raketkasy, chehııalyq Karolına Plıshkovamen kúsh synasty, dep habarlaıdy QazAqparat tilshisi.
Dúısenbide jańartylǵan reıtıngte 60-ynshy orynǵa kóterilgen Zarına bul kezdesýde bar ónerin saldy.
Birinshi partııada chehııalyq sportshy 6:4 esebimen basym tústi.
Ekinshi set odan áldeqaıda tartysty órbidi. Zarına da birneshe ret breık jasap, tarazy basyn teńestirip otyrdy. Esep 5:4 bolǵan mezette qazaqstandyq tennısshi tórt birdeı setboldy paıdalana almady. Aqyry bul partııanyń taǵdyry taı-breıkte sheshildi. Munda K.Plıshkova ábjildik tanytty - 7:4.
Kezdesý 1 saǵat 37 mınýtqa sozyldy.
Budan buryn Z.Dııas K.Plıshkovamen eki márte kezdesip, ekeýinde de jeńilip qalǵan bolatyn.
Eske sala keteıik, AQSh-tyń ashyq chempıonatynda Qazaqstannan sondaı-aq Mıhaıl Kýkýshkın men ıÝlııa Pýtıntseva qatysýda. Olar birinshi aınalymda amerıkalyqtar Noı Rýbın jáne Bernardo Peramen kortqa shyǵady.
US Open týrnıriniń alǵashqy kúni áıelder arasynda kútpegen nátıje de tirkeldi. Álemniń birinshi raketkasy, rýmynııalyq Sımona Halep dúnıejúzilik reıtıngte 44-inshi satyda turǵan estonııalyq Kaııa Kanepıden utylyp, jarys jolynan shyǵyp qaldy.
