Tennıs: Zarına Dııas Strasbýrg týrnıriniń jartylaı fınalyna shyǵa almady
ASTANA. QazAqparat - Qazaqstannyń birinshi, álemniń 53-inshi raketkasy Zarına Dııas Strasbýrg týrnıriniń shırek fınalynda reseılik Anastasııa Pavlıýchenkovamen kúsh synasty, dep habarlaıdy QazAqparat tilshisi.
Dúnıejúzilik reıtıngte 31-inshi orynda turǵan, Zarınadan eki jas úlkendigi bar reseılik tennısshi osy týrnırdiń úshinshi raketkasy bolyp tirkelgen tájirıbeli sportshy edi.
Birinshi partııada ekinshi geım kezinde Zarına qulap, sol qolyn aýyrtyp alyp, medıtsınalyq qyzmetke júgindi. Degenmen ol sodan keıin breık jasap, 3:1 esebimen alǵa shyqty. Áıtse de Anastasııa sol boıda ese qaıyryp, tarazy basyn teńestirdi. Sodan keıin esep 4:4 bolyp turǵan mezette breık jasaı bilip, óz geımin de jibermeı, birinshi partııany jeńispen aıaqtady - 6:4.
Ekinshi partııany Zarına sátsiz bastap, qarsylasynyń breık jasaýyna jol berip qoıdy. Sodan keıin ese qaıyryp, esepti teńestirgenimen, reseılik sportshy taǵy bir breıkke qol jetkizdi - 3:2. Aqyry ol bul partııany 6:2 esebimen utty.
A.Pavlıýchenkova jartylaı fınalda álemniń 17-inshi, osy jarystyń birinshi raketkasy, avstralııalyq Eshlı Bartımen sheberlik baıqasady.
Eń bastysy, Z.Dııas «Úlken dýlyǵanyń» biri bolyp esepteletin Rolan Garros týrnıri aldynda Frantsııadaǵy jaǵdaıǵa beıimdelip, daıyndyǵyn biraz ushtaı aldy. Tek densaýlyǵy syr bermesin deńiz.
Eske sala keteıik, budan buryn Mıhaıl Kýkýshkınniń Lıon týrnıriniń shırek fınalyndaǵy qarsylasy anyqtalǵanyn jazǵan bolatynbyz. Sondaı-aq Nıýrnberg týrnırinde taǵy bir qazaqstandyq ıÝlııa Pýtıntseva amerıkalyq Elıson Rıskemen shırek fınalǵa shyǵý úshin talasady.
Foto:sportx.kz
