Tennıs: Zarına Dııas Samanta Stosýrmen kezdesedi
ASTANA. QazAqparat - Japonııanyń Osaka qalasynda 12 qazan kúni tańmen bolatyn tennısten halyqaralyq týrnırdiń fınalynda qazaqstandyq Zarına Dııas avstralııalyq azýly sportshy Samanta Stosýrmen kezdesedi.
Osy jarys bastalar kezde Z.Dııastyń S.Stosýrmen joly fınalda toqaılasýy múmkin, basqa qarsylastarmen Zarına taıtalasa alady degen bolatynbyz. Sol aıtqanymyz keldi. S.Stosýr búgin ekinshi jartylaı fınalda ýkraın qyzy Elına Svıtolınany 7:6, 6:2 esebimen jeńdi.
Sońǵy syn, árıne, Zarınaǵa ońaı tımeıdi. Samanta - basqasyn aıtpaǵanda, «úlken dýlyǵa» dep atalatyn týrnırdi utqan, ataǵynan at úrketin tennısshi.
2011 jyly Amerıka ashyq chempıonatynyń fınalynda qazir álemdik reıtıngtiń kóshin bastap kele jatqan Serena Ýılıamstyń ózin tize búktirip, jeńimpaz atanǵan. Degenmen, otyzdyń bıigine shyqqan Samantadan áldeqaıda jas sportshymyzǵa sáttilik tileıik.
