TENNIS: Zarına Dııas Rolan Garros týrnıriniń ekinshi aınalymyna ótti
ASTANA. QazAqparat - Parıjde ótip jatqan Rolan Garros týrnıriniń birinshi aınalymynda qazaqstandyq Zarına Dııas Germanııa eliniń ókili, ózinen eki jas kishi Karına Vıttheftpen sheberlik baıqasty.
Tikeleı sporttyq kórsetilim arqyly málim bolǵanyndaı, 36 mınýtqa sozylǵan birinshi partııada qos birdeı breık jasaǵan Karına 6:2 esebimen alǵa shyqty. Ekinshi set odan góri tartystyraq órbidi. Munda Zarına qos birdeı breık jasasa, qarsylasy bireýine ǵana qol jetkizdi. 43 mınýtta aıaqtalǵan bul partııada Z.Dııas 6:4 esebimen jeńiske jetti. Sheshýshi, úshinshi partııa qazaqstandyq tennısshi úshin sátsiz bastaldy. Nemis qyzy breık jasap, 1:0 esebimen alǵa shyqqanymen, odan keıin Zarına oıyn tizginin óz qolyna aldy. Bul sette úsh birdeı breık jasaǵan qazaq qyzy 6:2 esebimen utty.
Sóıtip, álemdik reıtıngte 90-ynshy orynda kele jatqan Z.Dııas ekinshi aınalymda álemdegi myqty tennısshilerdiń biri, osy týrnırdiń altynshy raketkasy, rýmynııalyq Sımona Haleppen kezdesedi. Buǵan deıin Zarına S.Halepti jeńip kórgen emes.
Eske sala keteıik, ótken jyly Rolan Garros týrnırinde Z.Dııas ekinshi aınalymǵa deıin jetip, onda belgııalyq Elıson Van Eıtvankqa ese jibergen bolatyn.
