Tennıs: Zarına Dııas Rım týrnırinde utylyp qaldy
NUR-SULTAN. QazAqparat –Qazaqstandyq Zarına Dııas Rım WTA týrnıriniń irikteý saıysynda jeńilip qaldy, dep habarlaıdy QazAqparat tilshisi.
Álemniń 69-raketkasy Z.Dııas reıtıngte 110-orynda turǵan reseılik Anna Kalınskaıamen sheberlik baıqasady.
Zarına bıyl 27-ge tolatyn tájirıbeli tennısshi bolsa, qarsylasy 21 jasta edi.
Birinshi partııada reseılik sportshy alǵa shyqqanymen, Zarına qýyp jetti. Áıtse de esep 5:3 bolyp, setke dop bergende, sol múmkindigin paıdalana almady. Al A.Kalınskaıa qatarynan tórt geımge qol jetkizdi – 7:5.
Ekinshi sette Z.Dııas 4:0 esebimen alǵa ketti. Qarsylasy esepti qysqartýǵa tyrysqanymen, qazaqstandyq tennısshi taǵy bir breıkpen túıindeı bildi – 6:2.
Úshinshi, sheshýshi partııada A.Kalınskaıa 5:1 esebimen alǵa shyqty. Aqyry ol matchty taǵy bir breıkpen támamdaı aldy – 6:3.
Tartysty ótken báseke 2 saǵatqa jýyq ýaqytqa sozyldy.
Osylaısha koronavırýsqa baılanysty oryn alǵan úzilisten keıin Z.Dııas úsh birdeı jarysta birde-bir jeńiske qol jetkize almaı otyr. Munyń aldynda ol AQSh-tyń ashyq chempıonaty jáne Ystanbul týrnıriniń alǵashqy aınalymynan asa almaǵan edi.
Reseılik tennısshi irikteý saıystarynyń fınalynda ıspanııalyq Alena Bolshovamen kezdesedi. Ony jeńse, 14 qyrkúıekte bastalatyn negizgi týrnırge ótedi.
Taǵy bir qazaqstandyq, álemniń 90-raketkasy Mıhaıl Kýkýshkın erler arasyndaǵy Rım ATP týrnıriniń irikteý saıysynda reıtıngte 184-satydaǵy shvetsııalyq Elıas Imermen kortqa shyǵady.
Eske sala keteıik , budan buryn ATP jańadan qosqan jarystyń biri Nur-Sultan qalasynda ótetinin jazǵan bolatynbyz.
