TENNIS: Zarına Dııas óz baǵyn Hobart týrnırinde synaýda
ASTANA. QazAqparat - Qazaqstannyń birinshi raketkasy, álemdik reıtıngte 32-inshi orynda turǵan Zarına Dııas Avstralııanyń Hobart qalasynda 11-17 qańtar aralyǵynda ótip jatqan halyqaralyq týrnırge qatysýda.
Chempıonat.kom saıtynan alynǵan málimetke qaraǵanda, atalmysh týrnırdiń júlde qory - 250 myń AQSh dollary. Bul jarystyń birinshi raketkasy dúnıejúzilik reıtıngte 29-orynda turǵan avstralııalyq Keısı Dellakýa bolsa, Zarına №2 tennısshi bolyp synǵa túsedi. Týrnırge sondaı-aq ıtalııalyq Kamıla Djordjı, amerıkandyqtar Sloan Stıvens, Elıson Rıske, chehııalyq Klara Kýkalova, germanııalyq Mona Bartel, japonııalyq Kýrýmı Nara syndy belgili tennısshiler qatysýda.
Zarına Dııas birinshi aınalymda ıspandyq Sılvııa Soler-Espınosamen kúsh synasady. Ony utqan jaǵdaıda slovakııalyq Danıela Gantýhova nemese gollandııalyq Rıhel Hogenkamptyń qaı jeńgenimen kortqa shyǵady.
Bul týrnır 19 qańtarda bastalatyn Avstralııanyń ashyq chempıonatyna daıyndyq ispettes.
Aıta keteıik, ótken aptada Z.Dııas Qytaıdyń Shenchjen qalasynda ótken jarysta shırek fınalǵa deıin jetken bolatyn.
