Tennıs: Zarına Dııas Nottıngem týrnırinde US Open chempıonymen kezdesedi
ASTANA. QazAqparat - Qazaqstandyq Zarına Dııastyń Nottıngem (Ulybrıtanııa) týrnırindegi qarsylasy anyqtaldy, dep habarlaıdy «QazAqparat» tilshisi.
Osy týrnırdiń 7-inshi raketkasy bolyp tirkelgen Zarına alǵashqy aınalymda avstralııalyq tájirıbeli tennısshi, 2011 jylǵy US Open týrnıriniń jeńimpazy, 34 jasar Samanta Stosýrmen sheberlik baıqasady.
Qazirgi kezde jasy birazǵa kelip qalǵanymen, S.Stosýr osal qarsylas emes, senbi kúni márege jetken «Rolan Garros» týrnıriniń úshinshi aınalymynda ol álemniń 3-inshi raketkasy, ıspanııalyq Garbıne Mýgýrýsaǵa jol bergen bolatyn. Al Z.Dııas ekinshi aınalymda japonııalyq Naomı Osakadan utylǵan edi.
Júlde qory 250 myń AQSh dollary bolatyn Nottıngem týrnıri 17 maýsymda márege jetedi. Bul kógaldaǵy tennısten Ýımbldon týrnıri qarsańynda ótetin sportshylar úshin daıyndyq jarysynyń biri bolyp esepteledi.
Aıta keteıik, Zarına Dııastyń kógaldaǵy korttaǵy kórsetkishteri jaman emes. 2014 jáne 2015 jyldary qazaqstandyq tennısshi Ýımbldon týrnıriniń tórtinshi aınalymyna deıin jetip, birinde álemniń qazirgi birinshi raketkasy, rýmynııalyq Sımona Halepten, ekinshisinde ataqty reseılik Marııa Sharapovadan jeńilgen edi. Al ótken jyly úshinshi aınalymyna deıin bara aldy. Bıyl da odan kem deńgeıde óner kórsetpeý úshin tyńǵylyqty ázirlik kerek-aq.
