Tennıs: Zarına Dııas Monterreı týrnıriniń ekinshi aınalymyna shyqty
NUR-SULTAN. QazAqparat - Qazaqstandyq tennısshi Zarına Dııas Monterreı (Meksıka) týrnıriniń alǵashqy aınalymynda meksıkalyq Renata Sarasýamen kezdesti, dep habarlaıdy QazAqparat tilshisi.
Z.Dııas osy dúısenbide jańartylǵan álemdik reıtıngte 92-den 107-orynǵa syrǵyp ketse, jarysqa lakı-lýzer retinde shaqyrtý alǵan qarsylasy 243-satyda edi.
Báseke qazaqstandyq tennısshi úshin sátsiz bastalyp, breık jasaǵan R.Sarasýa 2:0 esebimen alǵa shyqty. Degenmen budan keıin oıyn tizginin qolyna alǵan Zarına qos breıkpen birge óz geımderin de jibermedi - 5:2. Alaıda birneshe setboldy paıdalana almaǵan Z.Dııas qarsylasynyń breık jasaýyna múmkindik berip qoıdy. Abyroı bolǵanda, asa tartysty setti taǵy bir breıkpen túıindedi - 7:5.
Ekinshi partııa basynda qazaqstandyq sportshy dop bergende, meksıkalyq breık-poınttardy paıdalana almady. Esesine esep 3:2 bolǵan mezette Zarına breık jasaı aldy. Sosyn óz geımin alyp, 5:2-ge jetkizgenimen, qarsylasy dop bergende, úsh matchboldy múlt jiberdi. Budan keıin Renata breık jasady - 4:5. Tórtinshi matchbolda Zarınaǵa tor da kómektesti - 6:4.
Tartysty kezdesý 1 saǵat 54 mınýtqa sozyldy.
Z.Dııas shırek fınalǵa shyǵý úshin kezinde dúnıejúzilik reıtıngte kósh bastaǵan, qazir 67-satyda turǵan Belarýs eliniń ókili Vıktorııa Azarenko nemese negizgi jarysqa irikteý saıystarynan keıin qosylǵan japonııalyq, álemniń 514-raketkasy Mııý Katonyń bireýimen talasady.
Júlde qory 250 myń AQSh dollaryna baǵalanǵan Monterreı týrnıri 7 sáýirde márege jetedi. Oǵan álemniń 5-raketkasy, germanııalyq Anjelıka Kerber, osy jarystyń ótken jylǵy jeńimpazy, reıtıngte 19-oryndaǵy ıspanııalyq Garbıne Mýgýrýsa bastaǵan tennısshiler qatysýda.
Eske sala keteıik, budan buryn Zarına Dııastyń Monterreı týrnırine qatysatynyn jazǵan bolatynbyz.
