Tennıs: Zarına Dııas Melbýrn týrnıriniń úshinshi aınalymyna shyqty
NUR-SULTAN. QazAqparat – Qazaqstandyq, álemniń 83-raketkasy Zarına Dııas Melbýrnda WTA Phillip Island Trophy týrnıriniń úshinshi aınalymyna shyqty, dep habarlaıdy QazAqparat tilshisi.
Qazaqstandyq tennısshi ekinshi aınalymda dúnıejúzilik reıtıngte 96-orynda turǵan rýmynııalyq Ana Bogdanmen kezdesti.
Birinshi partııada esep 5:3 bolǵan mezette setke dop bergen Z.Dııas sol múmkindigin múlt jiberdi. Degenmen setti taǵy bir breıkpen támamdady – 6:4.
Ekinshi sette A.Bogdan 3:1 esebimen alǵa ketkenimen, Zarına uzatpaı-aq tarazy basyn teńestirdi – 3:3. Áıtse de rýmynııalyq tennısshi qaıta breık jasady – 5:3.
Z.Dııas ta berilmeı baqty – 5:5. Biraq A.Bogdan degenine jetti – 7:5.
Match barysynda oń aıaǵyn aýyrsynǵan qazaqstandyq sportshy medıtsınalyq kómekke de júgindi.
Úshinshi, sheshýshi partııada esep 3:2 bolǵan mezette Zarına breık jasaı aldy – 4:2. Sosyn qıyndaý órilgen matchty taǵy bir breıkpen támamdady – 6:2.
Tartysty báseke 2 saǵat 19 mınýtqa sozyldy.
Zarına Dııas shırek fınalǵa shyǵý úshin álemniń 9-ynshy, osy dodanyń 2-raketkasy, 2019 jylǵy AQSh chempıonatynyń jeńimpazy, kanadalyq Bıanka Andreeský nemese reıtıngte 85-satydaǵy amerıkalyq Medıson Brengldiń bireýimen talasady.
Melbýrn dodasy 19 aqpanda márege jetedi.
Eske sala keteıik, budan buryn Zarına Dııastyń Melbýrn týrnırin jeńispen bastaǵanyn jazǵan bolatynbyz.
