Tennıs: Zarına Dııas Marııa Sharapovaǵa ese jiberdi
ORAL. QazAqparat - Qazaqstandyq tennısshi Zarına Dııas Qytaıdaǵy Shenchjen týrnırinde reseılik Marııa Sharapovamen kúsh synasty, dep habarlaıdy «QazAqparat» tilshisi.
Tikeleı efırde kórsetkenindeı, kezdesý tartysty órbidi. Tipti keı tustarda Zarına kezinde dúnıejúzilik reıtıngte kósh bastaǵan ataqty qarsylasynan qaımyqpaı, terezesi teń dárejede óner kórsete bildi. Degenmen myqtynyń aty myqty, birinshi partııada esep 2:3 bolyp turǵan kezde M.Sharapova breık-poınttardyń birin paıdalana bildi. Mundaı múmkindikter Z.Dııasta da bolmaı qalǵan joq, biraq odan qazaqstandyq tennısshi nátıje shyǵara almady. Sóıtip birinshi partııada Marııa 6:3 esebimen basymdylyq kórsetti.
Ekinshi partııada reseılik tennısshi úshinshi geımde Zarına dop bergende, taǵy bir márte breık jasady. Degenmen kelesi geımde Z.Dııas qarymta qaıyryp, esepti qaıta teńestirdi. Budan keıin ózi dop bergende, sheber oınap, 3:2 esebimen alǵa shyqty. Biraq esep 3:3 bolǵan sátte Zarına dop bergende, óz basymdylyǵyn paıdalana almasa, kerisinshe Sharapova breık jasap, sheberligin tanytty. Budan keıin taǵy bir breıkke qol jetkizgen reseılik tennısshi ekinshi partııada da 6:3 esebimen jeńiske jetti.
Bul - tennısshilerdiń ózara úshinshi kezdesýi. 2015 jyly Zarına Aýstralııa ashyq chempıonatynda 1:6, 1:6, sodan keıin Ýımbldon týrnırininiń tórtinshi aınalymynda 4:6, 4:6 esebimen Marııaǵa ese jibergen bolatyn. Bulardyń ekeýi de - álem chempıonatymen teń sanalatyn «Úlken dýlyǵa» týrnırleri. Sporttyq jolynda mundaı týrnırdi bes márte utqan M.Sharapova qazirgi kezde reıtıngte 59-ynshy, al Z.Dııas 66-ynshy orynda tur.
Aıta keteıik, búgingi tańda tennısshiler 15 qańtarda bastalatyn Aýstralııa ashyq chempıonatyna daıyndyq retinde týrnırlerge qatysýda. Shenchjen týrnıri - sondaı jarystyń biri. Sondyqtan Shenchjen týrnıriniń shırek fınalynda álemdegi mańdaıaldy tennısshilerdiń birinen jeńilgen Zarına úshin de basty maqsat aldaǵy «Úlken dýlyǵa» jarysyna tyńǵylyqty ázirlenip, barynsha sátti óner kórsetý bolsa kerek.
