Tennıs: Zarına Dııas Madrıd týrnıriniń irikteý saıysyn sátti bastady
ORAL. QazAqparat – Qazaqstandyq Zarına Dııas Madrıd WTA týrnıriniń irikteý saıysyn sátti bastady, dep habarlaıdy QazAqparat tilshisi.
Álemniń 89-raketkasy Z.Dııas dúnıejúzilik reıtıngte 100-orynda turǵan ıtalııalyq Martına Trevızanmen kezdesti.
Tennısshilerdiń ekeýi de 27 jasta. M.Trevızan ońaı shaǵylatyn jańǵaq emes. Ol ótken jyly Rolan Garros týrnırinde aıdy aspanǵa shyǵaryp, shırek fınalǵa deıin jetti.
Birinshi partııada eki breık jasaǵan Zarına basymdylyqty ýysynan shyǵarǵan joq – 6:2.
Qazaqstandyq tennısshi ekinshi sette de qos breıkpen alǵa ketti – 3:0. Budan keıin ıtalııalyq sportshy qaıyra breık jasap, esepti qysqarta aldy – 2:3. Degenmen Zarına matchqa dop bergende, múmkindigin múlt jibergen joq – 6:4.
Báseke 1 saǵat 25 mınýtqa sozyldy.
Z.Dııas irikteý saıystarynyń fınalynda reıtıngte 137-satydaǵy ýkraınalyq Katerına Kozlovamen sheberlik baıqasady. Ol álemniń 66-raketkasy, estonııalyq Kaııa Kanepıdi 6:1, 6:4 esebimen jeńip ketti. Zarına K.Kozlovany utsa, negizgi jarysqa joldama alady.
Z.Dııas jýyrda Ystanbul týrnıriniń alǵashqy aınalymynda K.Kanepıden 4:6, 4:6 esebimen jeńilip qalǵan bolatyn.
Eske sala keteıik, budan buryn E.Rybakına men Z.Dııastiń reıtıngide joǵary kóterilgenin, qazaqstandyq tennısshiniń Mysyrdaǵy týrnırde jeńimpaz atanǵanyn jazǵan bolatynbyz.
