Tennıs: Zarına Dııas Madrıd týrnırinde utylyp qaldy
ASTANA. QazAqparat - Qazaqstannyń birinshi, álemniń 54-inshi raketkasy Zarına Dııas Madrıd týrnıriniń alǵashqy aınalymynda Pýerto-Rıko eliniń ókili Monıka Pýıgpen kúsh synasty, dep habarlaıdy QazAqparat tilshisi.
Match Zarına úshin sátsiz bastalyp, dúnıejúzilik reıtıngte 69-ynshy satyda turǵan M.Pýıg (ol da bıyl Z.Dııas sııaqty 25-ke tolady) eki márte breık jasap, 4:0 esebimen alǵa shyqty. Tek sodan keıin ǵana qazaqstandyq tennısshi óz geımin aldy. Sosyn Zarına ózi breık jasady. Geımin de qur jibermegen ol esepti 3:4-ke deıin qysqartty. Degenmen Monıka bul partııada esesin jibermeı, 6:4 esebimen jeńiske jetti.
Ekinshi partııada dop berýdi bastaǵan Z.Dııas qatelese qoıǵan joq. Asa tartysty ótken tórtinshi geımde besinshi breık-poıntty qur jibermegen Zarına esepti 3:1-ge jetkizdi. Sońsoń ózi dop bergende, qarsylasyna esh múmkindik qaldyrǵan joq - 4:1. Taǵy bir breık - 5:1. Degenmen M.Pýıg ta qarap qalmaı, breıkke qol jetkizdi. Biraq kelesi geımde esesin qaıyrǵan Zarına bul partııada 6:2 esebimen basym tústi.
Úshinshi, sheshýshi partııany M.Pýıg breıkpen bastaǵanymen, kelesi geımde Z.Dııas tarazy basyn teńestire aldy. Alaıda Monıka qaıta eki breık jasap, óz geımderin de bermeı, 5:1 esebimen alǵa shyqty. Aqyry ol 6:2 esebimen utty.
Eki saǵatqa jýyq ýaqytqa sozylǵan kezdesý barysynda qazaqstandyq tennısshi óz múmkindikterin paıdalana almady.
Júlde qory 7,4 mln AQSh dollarynan asatyn Madrıd týrnıriniń ekinshi aınalymynda M.Pýıg álemniń 10-ynshy raketkasy, chehııalyq Petra Kvıtova nemese reıtıngte 38-inshi orynda turǵan ýkraınalyq Lesıa Tsýrenkonyń birimen kezdesedi.
Aıta keteıik, osy Madrıd týrnırinde erler arasynda Qazaqstannyń birinshi, álemniń 96-ynshy raketkasy Mıhaıl Kýkýshkın irikteý saıysynyń fınalynda dúnıejúzilik reıtıngte 71-inshi orynda turǵan serbııalyq Vıktor Troıtskımen kezdesedi. Ony jeńse, negizgi jarysqa joldama alady.
