Tennıs: Zarına Dııas Indıan-Ýells týrnırinde Serena Ýılıamske jol berdi
ASTANA. QazAqparat - Indıan-Ýellste (AQSh) ótip jatqan iri halyqaralyq týrnırdiń alǵashqy aınalymynda Qazaqstannyń birinshi, álemniń 53-inshi raketkasy Zarına Dııas ataqty amerıkalyq Serena Ýılıamspen kezdesti, dep habarlaıdy «QazAqparat» tilshisi.
Buǵan deıin dúnıejúzilik reıtıngte kósh bastap, «Úlken dýlyǵa» týrnırin 23 márte utqan S.Ýılıamstiń ótken jyly sábıli bolǵany belgili. Bul onyń kortqa oralǵannan keıingi birinshi kezdesýi bolatyn. Týrnır AQSh-ta ótip jatqandyqtan, ony jaqtaıtyn kórermenderdiń kóp bolýy zańdy edi.
S.Ýılıamstiń óziniń baı sporttyq jolynda (ol barlyǵy 72 jarystyń chempıony bolǵan) alǵash utqan týrnırleriniń biri osy Indıan-Ýells edi. Ol 1999 jyly 17 jasynda fınalda ataqty germanııalyq tennısshi Shteffı Grafty jeńgen edi.
Álemniń burynǵy birinshi raketkasy men qazaqstandyq tennısshi arasyndaǵy match, ásirese, Zarına dop bergen kezde tartysty órbidi. Besinshi geımde qazaqstandyq tennısshi Serenanyń tórt birdeı breık-pontty paıdalanýyna múmkindik bergen joq. Esep 5:5 bolǵan kezde S.Ýılıams breık jasap, alǵa shyqty. Budan keıin ózi dop bergen mezette úshinshi setbolyn paıdalanǵan amerıkalyq tennısshi birinshi partııada 7:5 esebimen jeńiske jetti.
Ekinshi partııada qaıta breık jasaǵan Serena 2:1 esebimen alǵa shyqty. Degenmen qarsylasy dop bergende qarymtasyn qaıtara bilgen Zarına tarazy basyn teńestirdi. Áıtse de budan soń amerıkalyq tennısshi taǵy bir breıkke qol jetkizdi. Zarına da qarap qalmaı, esepti teńestirgenimen, ózi dop bergende, múmkindigin paıdalana almady. Sóıtip taǵy bir breık jasaǵan Serena 6:3 esebimen basym tústi. Kezdesý 1 saǵat 33 mınýtqa sozyldy.
Ekinshi partııada eki márte breık jasaǵan Zarına ózi dop bergende, qatelespegende, kezdesý basqasha órbir me edi, kim bilgen.
Júlde qory 8,6 mln AQSh dollarynan asatyn, «Úlken dýlyǵa» týrnırlerinen keıingi eń aıtýly doda bolyp esepteletin Indıan-Ýells jarysynyń ekinshi aınalymynda S.Ýılıams Nıderlandy eliniń ókili, álemniń 29-ynshy raketkasy Kıkı Bertenspen kortqa shyǵady.
Eske sala keteıik, buǵan deıin Z.Dııas pen S.Ýılıamstiń eki ret joldary toqaılasqan bolatyn. Amerıkalyq tennısshi 2015 jyly osy Indıan-Ýells týrnırinde 6:2, 6:0, 2016 jyly Maıamıde (AQSh) birshama tartysty ótken básekede 7:5, 6:3 esebimen (bir qyzyǵy, osy esep bıyl da qaıtalandy) utqan edi.
