Tennıs: Zarına Dııas Hırosıma týrnırin jeńispen bastady
NUR-SULTAN. QazAqparat – Qazaqstandyq Zarına Dııas Japonııadaǵy Hırosıma WTA týrnırin jeńispen bastady, dep habarlaıdy QazAqparat tilshisi.
Júlde qory 250 myń AQSh dollaryna baǵalanǵan jarystyń alǵashqy aınalymynda Z.Dııas Chernogorııa ókili Danka Kovınıchpen sheberlik baıqasty.
Dúnıejúzilik reıtıngte 80-orynda turǵan Zarına osy dodanyń 6-raketkasy bolyp tirkelse, qarsylasy 114-satyda edi.
Birden oıyn tizginin qolyna alǵan qazaqstandyq tennısshi qos birdeı breıkpen alǵa shyqty – 4:1. Aqyry osy basymdyqty ýysynan shyǵarǵan joq – 6:2.
Ekinshi sette Zarına breıkpen alǵa shyqqanymen, qarsylasy teńestirip úlgerdi – 1:1. Degenmen Z.Dııas taǵy bir breıkke qol jetkizip, óz geımin de aldy – 4:2. Taǵy da breık – 5:2. Matchqa dop bergende de qatelesken joq – 6:2.
Báseke 1 saǵat 19 mınýtqa sozyldy.
Z.Dııas ekinshi aınalymda álemniń 145-raketkasy, japonııalyq Nao Hıbıno nemese 233-satydaǵy kanadalyq Leıla Fernandestiń bireýimen kezdesedi.
Budan eki jyl buryn Z.Dııas osy týrnırdiń (ol kezde Tokıo dep atalatyn) jeńimpazy atanǵan bolatyn. Bul Zarınanyń WTA dodalaryndaǵy alǵashqy jeńisi edi. Ótken jyly shırek fınalyna deıin ǵana jetken-di. Týrnırdiń ótken jylǵy jeńimpazy, reıtıngte 28-orynda turǵan taıbeılik Se Shýveı bıyl 1-raketka bolyp tirkelgen.
Basqa qazaqstandyq tennısshiler Qytaıda baq synaýda. Qazaqstannyń birinshi, álemniń 39-raketkasy ıÝlııa Pýtıntseva Chjenchjoý WTA týrnıriniń alǵashqy aınalymynda reıtıngte 66-oryndaǵy slovenııalyq Tamara Zıdanshekpen kortqa shyǵady.
Taǵy bir qazaqstandyq, álemniń 69-raketkasy Elena Rybakına Nanchan WTA jarysynda betashar matchyn reıtıngte 194-oryndaǵy úndistandyq Ankıta Raınamen ótkizedi. Osy dodaǵa irikteý saıystarynyń jeńimpazy retinde qosylǵan reıtıngte 355-satyda turǵan Anna Danılına álemniń 250-raketasy, qytaılyq Fanchjoý Lıýdyń shamasyn baıqap kóredi.
