TENNIS: Zarına Dııas Gonkong týrnırinde birinshi aınalymnan asa almady
ASTANA. QazAqparat - Qazaqstandyq tennısshi Zarına Dııas Qytaıdyń Gonkong qalasynda ótip jatqan «Hong Kong Tennis Open» týrnıriniń birinshi aınalymynda jeńilip qaldy, dep habarlaıdy QazAqparat.
Otandasymyz bul básekede álemniń 4-raketkasy jáne osy týrnırdiń birinshi nómirli oıynshysy ýkraınalyq Elına Svıtolınamen kezdesti. 1 saǵat 43 mınýtqa sozylǵan eki set qortyndysy boıynsha Zarına 4:6 jáne 6:7 esebimen ýkraınalyqqa jol berdi.
Aıta keteıik, bul Zarına Dııaspen Elına Svıtolına ekeýiniń ekinshi ret kezdesýi. 2011 jyly otandasymyz Svıtolınany qapy qaldyrǵan bolatyn.
Sol kezdesýden beri Elına Svıtolına WTA aıasyndaǵy túrli básekelerde 5 ret jeńimpaz atanyp, álemdik reıtıngi 4-orynǵa deıin kóterildi. Al Zarına Dııas jaraqatyna baılanysty álemdik reıtıngide 31-orynnan quldyrap, TOP 100-den shyǵyp qalǵan edi. Jaraqatynan saýyqqannan keıin otandasymyz qyrkúıek aıynda Tokıo qalasyndaǵy WTA básekesinde jeńimpaz atandy. Sondaı-aq, Dııas jańartylǵan WTA reıtınginde 62 orynǵa jaıǵasty.
