Tennıs: Zarına Dııas Tsıntsınnatıdiń negizgi týrnırine joldama aldy
NUR-SULTAN. QazAqparat – Qazaqstandyq Zarına Dııas Tsıntsınnatıde (AQSh) negizgi týrnırge joldama aldy, dep habarlaıdy QazAqparat tilshisi.
Álemniń 79-raketkasy Z.Dııas irikteý saıystarynyń fınalynda reıtıngte 55-oryndaǵy amerıkalyq Djessıka Pegýlamen kezdesti.
Úsh saǵatqa jýyq sozylǵan match óte tartysty ótti.
Birinshi partııada taı-breıkte D.Pegýla basym tústi – 7:6 (7:4). Ekinshisinde Z.Dııas ese qaıyrdy – 7:6 (7:3).
Úshinshi, sheshýshi partııany qazaqstandyq tennısshi jeńispen túıindedi – 6:4.
Osylaısha Z.Dııas júlde qory 3 mln AQSh dollaryna jýyqtaıtyn Tsıntsınnatıdiń negizgi týrnırine joldama aldy. Zarına onda álemniń burynǵy birinshi, qazir 10-raketkasy, ataqty Serena Ýılıamspen sheberlik baıqasady.
Sábıli bolýyna baılanysty sporttyq jolyndaǵy úzilisten keıin kortqa qaıta oralǵan «Úlken dýlyǵa» týrnırleriniń 23 márte chempıony S.Ýılıams naǵyz babyna endi enip keledi. Ol jeksenbi kúni aıaqtalǵan Toronto (Kanada) dodasynyń fınalyna deıin jetti. Biraq arqasynyń jaraqatyna baılanysty fınalda nebári tórt geım ótkizip, esep kanadalyq Bıanka Andreeskýdiń paıdasyna 1:3 bolǵannan keıin jarysty jalǵastyrýdan bas tartty. Onyń Tsıntsınnatıde kortqa shyǵý-shyqpaýy ázirge belgisiz. Eger Serena bas tartsa, ony basqa tennısshi almastyratyn bolady.
Tsıntsınnatıde Qazaqstannyń birinshi, álemniń 42-raketkasy ıÝlııa Pýtıntsevanyń qarsylasy da osal emes. Ol álemdik reıtıngte 82-orynda turǵan, 2017 jylǵy Rolan Garros týrnıriniń jeńimpazy Elena Ostapenkomen kúsh synasady.
Erler arasyndaǵy Tsıntsınnatı jarysynda Qazaqstannyń birinshi, álemniń 44-raketkasy Mıhaıl Kýkýshkın negizgi týrnırge óte almaı qaldy. Ol irikteý saıystarynyń fınalynda álemniń 70-raketkasy, reseılik Andreı Rýblevten 6:3, 4:6, 3:6 esebimen jeńilip qaldy.
Eske sala keteıik, budan buryn M.Kýkýshkın men Z.Dııastyn Tsıntsınnatıde irikteý saıysyn sátti bastaǵanyn jazǵan bolatynbyz.
