Tennıs: Zarına Dııas Chıkagoda negizgi týrnırge joldama aldy
NUR-SULTAN. QazAqparat – Qazaqstandyq, álemdik reıtıngte 112-orynda turǵan Zarına Dııas Chıkago WTA 250 týrnıriniń irikteý saıystaryn sátti ótkizdi, dep habarlaıdy QazAqparat tilshisi.
Іrikteý saıystarynyń 4-raketkasy bolyp tirkelgen Z.Dııas aldymen reıtıngte 448-satydaǵy ulybrıtanııalyq Eden Sılvany 6:0, 6:1 esebimen oısyrata utty.
Qazaqstandyq tennısshi irikteý saıystarynyń fınalynda álemniń 254-raketkasy, ońtústikkoreıalyq Na-Le Hanmen kúsh synasty.
Z.Dııas saǵat jarymnan astam ýaqytqa sozylǵan matchta 5:7, 6:1, 6:1 esebimen jeńiske jetti. Ol báseke barysynda 13 breık-poınttyń 10-yn paıdalandy. Qarsylasy 10 breık-poınttyń altaýyn óz esebine jazdy. Tennısshiler birde-bir eıs jasaǵan joq.
Osylaısha Zarına negizgi jarysqa joldama aldy. Chıkago WTA 250 týrnıri 23-30 tamyz aralyǵynda ótedi. Z.Dııastyń negizgi dodadaǵy qarsylasy keıin anyqtalady.
Taǵy bir qazaqstandyq, reıtıngte 292-oryndaǵy Anna Danılına Klıvlend (AQSh) WTA 250 dodasynda baq synaıdy. Onyń qarsylasy – álemniń 130-raketkasy, amerıkalyq Ketı Maknallı.
Eske sala keteıik, budan buryn Zarına Dııas Chıkago WTA 125 týrnıriniń jartylaı fınalyna óte almaǵan bolatyn.
Qazaqstandyq jas tennısshiler Ózbekstanda ótken jarysta jeńimpaz atandy.
