Tennıs: Zarına Dııas Chıkago týrnıriniń jartylaı fınalyna shyǵa almady
NUR-SULTAN. QazAqparat – Qazaqstandyq Zarına Dııas Chıkago WTA 125 týrnıriniń jartylaı fınalyna shyǵa almady, dep habarlaıdy QazAqparat tilshisi.
Dúnıejúzilik reıtıngte 112-orynda turǵan Z.Dııas shırek fınalda álemniń 66-ynshy, osy jarystyń 3-raketkasy, amerıkalyq Enn Lımen kortqa shyqty.
Birinshi partııada breık jasaǵan amerıkalyq tennısshi basymdylyq kórsetti – 6:4. Ekinshisinde Zarına artyǵymen ese qaıyrdy – 6:2.
Úshinshi, sheshýshi sette aldymen Lı breık jasap, alǵa shyqqanymen, Zarına tarazy basyn teńestirdi – 2:2. Alaıda amerıkalyq sportshy kúsh alyp, esepti 5:2-ge jetkizdi. Budan keıin qazaqstandyq tennısshi qaıyra breık jasaǵanymen, odan árige shamasy jetpedi – 3:6.
Tartysty báseke 1 saǵat 56 mınýtqa sozyldy.
E.Lı fınalǵa shyǵý úshin aýstralııalyq Storm Sanders nemese danııalyq Klara Taýsonnyń bireýimen talasady.
Eske sala keteıik, budan buryn Elena Rybakına Tsıntsınnatı masters týrnıriniń shırek fınalyna óte almaǵanyn, elordada Astana Open halyqaralyq týrnıri bolatynyn, Aleksandr Nedovesovtiń Germanııadaǵy jarystyń fınalyna shyqqanyn jazǵan edik.
