Tennıs: Zarına Dııas Chıkago týrnırinde jeńilip qaldy
NUR-SULTAN. QazAqparat – Qazaqstandyq Zarına Dııas Chıkago WTA 250 týrnıriniń ekinshi aınalymyna shyǵa almady, dep habarlaıdy QazAqparat tilshisi.
Dúnıejúzilik reıtıngte 110-orynda turǵan Z.Dııas alǵashqy aınalymda álemniń 57-inshi, osy jarystyń 7-raketkasy, frantsııalyq Krıstına Mladenovıchpen kúsh synasty.
Birinshi sette frantsııalyq sportshy basymdylyq kórsete bildi – 6:2.
Tartysty ótken ekinshi partııa barysynda Zarına breık-poınttar ǵana emes, setboldy da múlt jiberdi. Aqyry taı-breıkte K.Mladenovıch jeńisti julyp aldy – 7:6 (7:3).
2 saǵat 12 mınýtqa sozylǵan básekede Z.Dııas 3 eıs jasap, 10 breık-poınttyń ekeýin ǵana paıdalandy. Qarsylasy 2 eıske qosa 10 breık-poınttyń tórteýin óz esebine jazdy.
K.Mladenovıch ekinshi aınalymda reıtıngte 361-satydaǵy kanadalyq Fransýa Abandamen sheberlik baıqasady. Ol bastapqy kezdesýinde álemniń 65-raketkasy, chernogorııalyq Danka Kovınıchti utyp ketti.
Júlde qory 235 myń AQSh dollarynan asatyn Chıkago dodasy 30 tamyzda márege jetedi. Bul – «Úlken dýlyǵa» týrnıriniń biri US Open aldyndaǵy sońǵy jarys.
Eske sala keteıik, budan buryn Zarına Dııastyń Chıkagoda negizgi týrnırge joldama alǵanyn, qazaqstandyq tennısshilerdiń álemdik reıtıngide joǵary kóterilgenin jazǵan bolatynbyz.
