Tennıs: Zarına Dııas AQSh-tyń ashyq chempıonatynda utylyp qaldy
NUR-SULTAN. QazAqparat – Qazaqstandyq Zarına Dııas US Open týrnıriniń ekinshi aınalymyna shyǵa almady, dep habarlaıdy QazAqparat tilshisi.
Dúnıejúzilik reıtıngide 69-orynda turǵan Zarına Dııas amerıkalyq, álemniń 61-raketkasy Bernarda Peramen kortqa shyqty.
Qazaqstandyq tennısshi bıyl 27-ge tolatyn bolsa, qarsylasy odan bir jas kishi, sheberlik deńgeıleri de shamalas edi.
Birinshi partııada Zarına 3:1 esebimen alǵa shyqqanymen, sol basymdylyǵyn ustap tura almady. Úsh geımdi qatar alǵan amerıkalyq 4:3 esebimen alǵa ketkenimen, qazaqstandyq tennısshi qaıta teńestirdi. Breık almasýmen bolǵan tennısshiler setti taı-breıkke deıin jetkizdi, munda B.Peranyń baǵy jandy – 7:6 (7:4).
Ekinshi sette amerıkalyq sportshy birden alǵa shyqty – 2:0. Aqyry ol bet qaratpady – 6:0.
Báseke 1 saǵat 45 mınýtqa sozyldy.
B.Pera júlde qory 53,4 mln AQSh dollaryna baǵalanǵan «Úlken dýlyǵa» týrnıriniń ekinshi aınalymynda álemniń 22-inshi, osy jarystyń 15-raketkasy, grekııalyq Marııa Sakkarımen nemese reıtıngte 114-satydaǵy shveıtsarııalyq Stefanı Fegelmen kezdesedi.
Eske sala keteıik, budan buryn Mıhaıl Kýkýshkınniń AQSh-tyń ashyq chempıonatyn sátti bastap, Elena Rybakınanyń ekinshi aınalymǵa shyqqanyn, ıÝlııa Pýtıntsevanyń da jeńgenin jazǵan bolatynbyz.
Foto: olympic.kz