Tennıs: Zara Dárken Ýkraınadaǵy týrnırdiń jartylaı fınalyna shyqty
NUR-SULTAN. QazAqparat – Qazaqstandyq Zara Dárken jasóspirimder arasynda Irpen (Ýkraına) qalasynda Tennis Europe serııasynda ótip jatqan Ukrainian Junior Open týrnıriniń jartylaı fınalyna shyqty, dep habarlaıdy QazAqparat tilshisi.
Qazaqstan tennıs federatsııasy málim etkenindeı, Z.Dárken jekeleı jáne juptyq synda da sátti óner kórsetýde.
Zara shırek fınalda tartysty matchta Izraıl ókili Sapır Koendi 6:4, 4:6, 7:6 esebimen utty. Búgin ol fınalǵa shyǵý úshin osy týrnırdiń 2-raketkasy, reseılik Marııa Golovınamen talasady.
Qazaqstandyq tennısshi juptyq synda jartylaı fınalda ýkraınalyq Evgenııa Zelenskaıamen birge kort ıeleri Veronıka Pavlenko – Dıana Smolınskaıamen sheberlik baıqasady.
«Týrnır men úshin tabysty ótýde. Alǵashqy aınalymnan bastap jaqsy oıyn órnegin kórsettim. Jartylaı fınalda da aıanyp qalmaımyn, jeńis úshin barymdy salamyn», dedi Zara Dárken.
Eske sala keteıik, budan buryn Elena Rybakınanyń Berlın týrnıriniń ekinshi aınalymyna shyqqanyn, al Aleksandr Býblıktiń Londonda shırek fınalǵa óte almaǵanyn jazǵan bolatynbyz.
E.Rybakına búgin Berlınde álemniń 13-raketkasy, ıspanııalyq Garbıne Mýgýrýsamen oınaıdy.
