Tennıs: Zara Dárken Parıjdegi týrnırdi jeńispen bastady
NUR-SULTAN. QazAqparat – Qazaqstandyq Zara Dárken Parıjde Tennis Europe serııasy aıasynda jasóspirimder arasyndaǵy birinshi sanattaǵy Open Stade Français týrnırin jeńispen bastady, dep habarlaıdy QazAqparat tilshisi.
Qazaqstan tennıs federatsııasy málim etkendeı, atalmysh jarysqa álemniń túrli elderinen 14 jasqa deıingi myqty oıynshylar qatysýda.
Kezinde osy dodada Sımona Halep, Jýstın Enen, Ons Jaber, Stefanos Tsıtsıpas, Hýan Martın Del Potro, Grıgor Dımıtrov, Fabıo Fonını jáne basqa tennıs juldyzdary chempıon boldy.
Zara jerebe boıynsha birinshi aınalymda bos boldy. Ekinshi kezeńde ol frantsııalyq Severın Deppnerdi 6:0, 7:5 esebimen tize búktirdi.
Z.Dárken shırek fınalǵa shyǵý úshin amerıkalyq Eddıson Komıskımen talasady.
Taǵy bir qazaqstandyq Danıel Tazabekov Ankarada 14 jasqa deıingiler arasynda ótken ekinshi sanattaǵy «Tennis Europe» týrnıriniń jeńimpazy atandy. Ol fınalda osy jarystyń 3-raketkasy, túrkııalyq Alı Sadıdi 6:0, 6:2 esebimen utty.
Bul – onyń sporttyq jolyndaǵy tuńǵysh tıtýly. Osyǵan deıin D.Tazabekov eki fınalǵa deıin jetip, sheshýshi básekede jeńilip qalǵan bolatyn.
Eske sala keteıik, budan buryn qazaqstandyq tennısshiniń Italııadaǵy týrnırdiń ekinshi aınalymyna shyqqanyn jazǵan bolatynbyz.
