Tennıs: Z.Dııas úshinshi aınalymnan asa almady
ORAL. QazAqparat - Tennısten AQSh-tyń ashyq chempıonatynda qazaqstandyq Zarına Dııas úshinshi aınalymda reseılik Ekaterına Makarovamen kezdesti.
Bul joly Z.Dııastan áldeqaıda tájirıbeli, jıyrma alty jasar E.Makarova 6:2, 6:4 esebimen jeńiske jetti.
Sóıtip qazaqstandyq tennısshiler arasynda jekeleı synda jalǵyz ózi úshinshi aınalymǵa jetken Z.Dııas odan ári asa almady. Degenmen osynyń ózin tabys dep esepteýge bolady. Buǵan deıin Avstralııanyń ashyq chempıonatynda úshinshi, Ýımbldonda tórtinshi aınalymǵa deıin jetken Zarına úshin 2014 jyl, jalpy alǵanda, sátti boldy. Qazirgi kezde álemdik reıtıngte Zarına 48-inshi orynda tursa, aldaǵy aptada budan joǵarylary anyq. Onyń nebári jıyrma jasta ekendigin eskersek, osy betinen qaıtpasa, bolashaqta budan da bıik asýlarǵa shyǵatynyna senýge bolady.
