Tennıs: Z.Dııas úshin Osaka artta qaldy, alda - Sıngapýr
ASTANA. QazAqparat - Qazaqstandyq tennısshi Zarına Dııas úshin ótken apta sátti boldy.
Osakada ótken halyqaralyq týrnırde fınalǵa deıin jetken Zarına avstralııalyq tennısshi, osy jarystyń úsh dúrkin, 2011 jylǵy AQSh ashyq chempıonatynyń jeńimpazy Samanta Stosýrǵa jol berdi. Munda, ásirese, birinshi partııada qazaq tennısshisi ataqty sportshymen terezesi teń oıyn órnegin kórsetti. Kezdesýden keıingi suhbatynda S.Stosýr Zarınanyń bastapqyda asa batyl oınaǵanyn, ár upaı úshin kúresip, onyń shabýylyna tótep berýge týra kelgenin atap ótti. Sondaı-aq, Samanta ózimen buryn sheberlik baıqaspaǵan Zarınanyń jaqsy oıynshy ekendigin moıyndap, onyń ne sebepten jańadan shyǵyp kele jatqan jas juldyz atalyp júrgenin túsingenin aıtty. Fınaldan keıingi marapatta Z.Dııastyń Samantadaı ataǵy jer jarǵan oıynshymen qatar turýynyń ózi buryn qol jetpegen nátıje edi.
Osaka týrnırindegi tabystan keıin Zarınanyń álemdik reıtıngte joǵary kóterileri anyq. Ótken aptada 1290 upaımen 37-inshi orynda turǵan Z.Dııas oǵan taǵy 180 upaı qosty. Bizdiń esebimizshe, osy dúısenbide ol 1470 upaımen 35-inshi satyǵa kóterilýi tıis. Sebebi osyǵan deıin odan joǵary, 1317 upaımen 36-ynshy orynda kele jatqan japondyq Kýrýmı Nara Osaka týrnırine qatyspaı qaldy. 35-inshi satydaǵy shveıtsarııalyq Belında Benchıch bolsa, ótken aptada Qytaıdyń Tıantszın týrnırinde fınalǵa deıin jetkendikten, ol Zarınanyń aldynda bolýy múmkin. Al 35-inshi satydaǵy (1327 upaı) frantsııalyq, tegi ıspandyq Karolın Garsııa Avstrııanyń Lınts qalasyndaǵy osyndaı jarystyń birinshi aınalymynda-aq jańazelandııalyq Marına Erakovıchten jeńilis tapty. ıAǵnı Zarına Kýrýmı Nara men Karolın Garsııany basyp ozyp, 35-inshi orynǵa turaqtaýy ábden múmkin.
Endi Zarınanyń aldynda taǵy bir úlken syn tur. Ol Sıngapýrde 17-21 qazanda ótetin jas juldyzdardyń fınaldyq básekesine qatysady. Áıelder tennıs qaýymdastyǵy (WTA) jarııalaǵan daýys berý nátıjesinde (oǵan álemniń 140 elinen 700 myńnan adam qatysqan) Azııa-Tynyq muhıt aımaǵynan Z.Dııas pen qytaı qyzy Chjen Saısaı, álemdik toptan pýertorıkandyq Monıka Pýıg pen amerıkalyq Shelbı Rodjers jeńimpaz atandy. Osy tórttiktiń eń úlkeni Sh.Rodjers 22 jasta, M.Pýıg odan bir jas kishi. Qytaı qyzy jıyrmada. Al Zarına osy aptada, ıaǵnı 18 qazan kúni 21 jasyn Sıngapýrde atap ótedi. Endeshe, Qazaqstannyń birinshi raketkasyna sáttilik tileıik.
