TENNIS: Z.Dııas Ýhanda Seýl týrnıriniń jeńimpazy I.Begýmen kezdesedi
ORAL. QazAqparat - Qytaıdyń Ýhan qalasynda tennısten bastalǵan iri halyqaralyq týrnırde Qazaqstannyń birinshi, álemniń 43-inshi raketkasy Zarına Dııas alǵashqy aınalymda rýmynııalyq Irına-Kamelııa Begýmen sheberlik baıqasady.
Chempıonat.kom saıtynan alynǵan málimetke qaraǵanda, I.Begý osy jeksenbide Seýlde aıaqtalǵan jarystyń jeńimpazy atandy. Ol fınalda belorýs qyzy Aleksandra Sasnovıchti 6:3, 6:1 esebimen ońaı jeńdi. Sóıtip 25 jasar tennısshi óziniń sporttyq ǵumyrynda ekinshi ret iri jeńisine qol jetkizdi. Budan buryn ol 2012 jyly Tashkent týrnırinde ozyq shyqqan edi. Osyǵan deıin álemdik reıtıngte 29-orynda kele jatqan I.Begý Seýldegi tabysynan keıin endi úsh satyǵa joǵarylaıdy.
Júlde qory 2,2 mln. AQSh dollarynan asatyn Ýhan jarysyna álemniń birinshi raketkasy, amerıkalyq Serena Ýılıamsten basqa myqtylardyń bári qatysýda.
Eske sala keteıik, buǵan deıin I.Begý men Z.Dııas úsh márte kezdesip, onyń ekeýinde rýmynııalyq tennısshi jeńiske jetken. Bıyl Nıý-Heıven týrnırinde I.Begý qazaq qyzyn 7:5, 5:7, 6:2 esebimen tize búktirgen bolatyn.
