Tennıs: Z.Dııas tartysty básekede D.Gantýhovaǵa ese jiberdi
ASTANA. QazAqparat - Taılandtyń Pattaııa qalasynda tennısten ótip jatqan halyqaralyq týrnırde búgin Qazaqstannyń birinshi, álemniń 33-inshi raketkasy Zarına Dııas slovakııalyq Danıela Gantýhovamen sheberlik baıqasty.
Chempıonat.kom saıtynan alynǵan málimetke qaraǵanda, Zarına kezdesýdi óte sátti bastap, birinshi partııada 6:1 esebimen jeńiske jetti. Alaıda osy basymdylyǵyn ustap tura almaı, qalǵan partııalarda 3:6, 1:6 esebimen utylýǵa májbúr boldy. Sóıtip D.Gantýhova bıyl Hobart týrnırinde Z.Dııastan jeńilip qalǵanynyń esesin qaıyrdy. Jalpy, ol da osal qarsylas emes. 2011 jáne 2012 jyldary osy Pattaııa týrnıriniń jeńimpazy atanǵan tájirıbeli oıynshy.
Aıta keteıik, bul jarystyń júlde qory - 250 myń AQSh dollary. Qazaqstandyq ıÝlııa Pýtıntseva keshe reseılik Evgenııa Rodınaǵa jol berse, elimizdiń ekinshi raketkasy ıAroslava Shvedova týrnırge qatysýdan bas tartty. Sonymen, qazaqstandyqtar úshin Pattaııa korty sátsiz boldy.
