Tennıs: Z.Dııas Shenchjen týrnıriniń ekinshi aınalymyna shyqty
ASTANA. QazAqparat - Qytaıdyń Shenchjen qalasynda ótip jatqan tennısten halyqaralyq týrnırdi qazaqstandyq Zarına Dııas jeńispen bastady.
Álemniń 52-inshi, Qazaqstannyń birinshi raketkasy Z.Dııas birinshi aınalymda dúnıejúzilik reıtıngte 140-ynshy orynda turǵan qytaılyq Chjan Kaılınmen kezdesip, ony 6:4, 7:6 esebimen utty.
Osy týrnırdiń jetinshi raketkasy bolyp tirkelgen Zarına Dııas kelesi aınalymda birinshi kezdesýinde rýmynııalyq Andrea Mıtýdy 6:3, 6:3 esebimen tize búktirgen chehııalyq Katerjına Sınıakovamen kortqa shyǵady.
Eske sala keteıik, júlde qory 426 750 AQSh dollaryn quraıtyn Shenchjen týrnırinde sondaı-aq taǵy bir qazaqstandyq, álemniń 67-inshi raketkasy ıAroslava Shvedova da óner kórsetedi. Ol estonııalyq Anett Kontaveıtpen kúsh synaspaq.
