Tennıs: Z.Dııas Osaka týrnıriniń fınalynda S.Stosýrge ese jiberdi
ASTANA. QazAqparat - Japonııanyń Osaka qalasynda tennısten halyqaralyq týrnır márege jetti.
Fınalda qazaqstandyq Zarına Dııas pen avstralııalyq Samanta Stosýrdyń kezdesýi 1 saǵat 40 mınýtqa sozyldy. Bul matchta Zarınadan áldeqaıda tájirıbeli Samanta 7:6, 6:3 esebimen jeńiske jetti. Birinshi partııa asa tartysty bolyp, onda Stosýr taık-breıkte ǵana 9:7 esebimen uta aldy. Al ekinshi partııada Samantanyń sheberligi anyq baıqaldy. Stosýr eki ret eıs jasap, úsh breık-pontty óz paıdasyna jazdy. Zarına eki eıske qol jetkizdi.
Osymen S.Stosýr Osaka týrnıriniń úsh dúrkin jeńimpazy atanyp otyr. Fınalǵa deıin jetken Z.Dııas ta bul jarysta jaqsy óner kórsetip, dúnıejúzilik reıtıngte óz esebine 180 upaı jazyp, 21400 dollar tabys tapty.
Qazaqstannyń birinshi raketkasy Z.Dııas osyǵan deıin ITF týrnırin bes ret utqanymen, Osakadaǵydaı, WTA jarystarynda ázirge ozyq shyǵa qoıǵan joq.
