TENNIS: Z.Dııas M.Sharapovadan aılasyn asyra almady
ASTANA. QazAqparat - Búgin Avstralııa ashyq chempıonatynyń úshinshi aınalymynda qazaqstandyq Zarına Dııas pen reseılik, álemniń ekinshi raketkasy Marııa Sharapova kezdesýin ótkizdi.
Atalmysh matchty Eýrosport telearnasy tikeleı efırden kórsetti. Úsh partııaǵa sozylǵan aldyńǵy oıynda oıda-joqta utylyp qala jazdaǵan M.Sharapovanyń bul joly asa jınaqy shyqqany birden baıqaldy. Birinshi partııada úsh breıkti utqan reseılik tennısshi 6:1 esebimen jeńiske jetti. Ekinshi partııada Zarına qarsylasy dop bergen kezde sátti oınap, bir breıkti paıdalana bildi. Alaıda budan keıingi alty birdeı geımde M.Sharapova jeńiske jetti. Sóıtip bul partııa da 6:1 esebimen aıaqtaldy. Zarına keıbir tustarda qarapaıym qatelikterge boı aldyrdy. Onyń aıtarlyqtaı qarsylyq kórsete almaýyna munyń aldynda úsh partııaǵa sozylǵan eki kezdesý men keshegi ońtústikafrıkalyq Shanel Sheperspen birge oınaǵan juptyq match ta sebep bolǵan sııaqty. Degenmen Z.Dııastyń bıyl da Avstralııa chempıonatynyń úshinshi aınalymyna deıin jetýin jaqsy tabys dep esepteýge bolady.
M.Sharapova tórtinshi aınalymda búgin ıA.Shvedovany utqan qytaı qyzy Pen Shýaıdyń shamasyn baıqap kóredi. Eger M.Sharapova men taǵy bir reseılik Ekaterına Makarova aldaǵy oıyndaryn sátti ótkizse, jartylaı fınalda ózara sheberlik baıqasady. Sonda keminde bir reseılik tennısshi fınalǵa shyǵady. M.Sharapova bul týrnırdi 2008 jyly utqan bolatyn.
