Tennıs: Z.Dııas E.Makarovadan óte almady
ASTANA. QazAqparat - Dýbaı qalasynda tennısten ótip jatqan iri halyqaralyq týrnırde qazaqstandyq Zarına Dııas búgin osy týrnırdiń altynshy, álemniń toǵyzynshy raketkasy, reseılik Ekaterına Makarovamen sheberlik baıqasty.
Chempıonat.kom saıtynan alynǵan málimetke qaraǵanda, bul kezdesýde 26 jasar reseılik tennısshi 6:3, 6:4 esebimen jeńiske jetti. Ol 13 breık-poınttyń altaýyn paıdalana bildi. Qazaqstannyń birinshi, álemniń 33-inshi raketkasy, 21 jasar Zarına úsh breık jasady.
Budan buryn atalǵan tennısshiler bir ret kezdesip, onda da E.Makarova jeńgen bolatyn. Endi shırek fınalda ol osy týrnırdiń birinshi raketkasy, rýmynııalyq Sımona Halep nemese bolgarııalyq Tsvetana Pıronkovanyń bireýimen kortqa shyǵady.
Eske sala keteıik, júlde qory 2,5 mln. AQSh dollarynan asatyn Dýbaı týrnırinde Z.Dııas keshe álemniń onynshy raketkasy, germanııalyq Andrea Petkovıchti utqan bolatyn.
