Tennıs: Z.Dııas asa tartysty kezdesýde A.Petkovıchke ese jiberdi
ASTANA. QazAqparat - Doha qalasynda tennısten ótip jatqan halyqaralyq týrnırdiń ekinshi aınalymynda Qazaqstannyń birinshi raketkasy Zarına Dııas germanııalyq, dúnıejúzilik reıtıngte onynshy oryndaǵy Andrea Petkovıchpen kúsh synasty.
Chempıonat.kom saıtynan alynǵan málimetke qaraǵanda, asa tartysty ótken matchtyń birinshi partııasyn 7:5 esebimen Zarına utsa, ekinshisinde nemis tennısshisi basymdylyq kórsetti (6:2). Úshinshi, sheshýshi partııada A.Petkovıch 6:4 esebimen jeńiske jetip, budan bir apta buryn Dýbaıda Zarınadan jeńilip qalǵanynyń qarymtasyn qaıyrdy. Degenmen bul oıyn qazaq tennısshisiniń álemniń úzdik oıynshylarymen terezesi teń dárejede taıtalasa alatynyn kórsetti.
Endi shırek fınalda A.Petkovıch álemniń toǵyzynshy, osy týrnırdiń besinshi raketkasy, reseılik Ekaterına Makarovany úsh partııada utqan chehııalyq, dúnıejúzilik reıtıngte 15-inshi satydaǵy Lıýsı Shafarjovamen kortqa shyǵady.
Aıta keteıik, Dýbaıda erler arasynda ótip jatqan iri týrnırde qazaqstandyq Andreı Golýbev ekinshi aınalymda álemniń birinshi raketkasy, serbııalyq Novak Djokovıchten jeńilis tapty.
