TENNIS: Z.Dııas alty birdeı matchboldy paıdalana almaı, jeńilip qaldy
ASTANA. QazAqparat - Qazaqstannyń birinshi, álemniń 32-inshi raketkasy, jıyrma bir jasar Zarına Dııas Ulybrıtanııanyń Nottıngem qalasynda ótip jatqan halyqaralyq týrnırdiń ekinshi aınalymynda amerıkandyq Sachııa Vıkerımen kúsh synasty.
Eýrosport 2 telearnasynan tikeleı efırde kórsetkenindeı, Zarına oıyndy óte sátti bastap, 5:0 esebimen alda turdy. Alaıda budan keıin 20 jasar, dúnıejúzilik reıtıngte 129-ynshy orynda turǵan S.Vıkerı qatarynan tórt geımdi utyp, esepti 4:5-ke deıin qysqartty. Birinshi partııadaǵy sońǵy geım asa tartysty bolyp, on bes mınýtqa sozyldy. Amerıkandyq tennısshi áldeneshe ret breık-poıntty paıdalana almady. Esesine tájirıbesi mol Zarına aqyry degenine jetip, birinshi partııany 6:4 esebimen jeńispen aıaqtady.
Ekinshi partııada aldymen breık jasaǵan S.Vıkerı 4:1 esebimen alǵa shyqty. Degenmen kóp uzamaı qarymta qaıtarǵan Zarına esepti teńestire aldy. Budan keıin taǵy bir breık jasaǵan ol óz geıminde úsh birdeı matchboldy sátti aıaqtaı almady. Sóıtip esep 5:5 bolyp qaıta teńesti. Sodan soń qaıta breık jasaǵan qazaqstandyq tennısshi esep 6:5 bolyp turǵanda, úsh matchbolyn taǵy da paıdalanbady. Taı-breıkte S.Vıkerı jeńiske jetti.
Úshinshi partııada amerıkandyq sportshy shıraq qımyldady. Kezdesý barysynda Zarına medıtsınalyq kómekke de júgindi. Z.Dııas ekinshi partııada alty matchboldy qur jiberse, úsh birdeı breıkke qol jetkizgen S.Vıkerı altynshy matchbolyn sátti paıdalana bildi. Sonymen, ol 6:1 esebimen sheshýshi partııany utyp ketti.
Aıta keteıik, júlde qory 250 myń AQSh dollaryna baǵalanǵan Nottıngem týrnıriniń shırek fınalynda S.Vıkerı horvatııalyq on jeti jasar Ana Konıýhpen kezdesedi.
