TENNIS: Z.Dııas álemniń birinshi raketkasy S.Ýılıamske jol berdi
ASTANA. QazAqparat - AQSh-tyń Indıan-Ýells qalasynda ótip jatqan tennısten halyqaralyq týrnırde qazaqstandyq Zarına Dııas úshinshi aınalymda álemniń birinshi raketkasy Serena Ýılıamske jol berdi.
Chempıonat.kom saıtynan alynǵan málimetke qaraǵanda, S.Ýılıams 6:2, 6:0 esebimen jeńiske jetti.
Sóıtip, Zarına álemdik reıtıngtiń kósh basynda kele jatqan tennısshimen de kezdesip kórdi. Buǵan deıin ol ótken jyly qazir álemniń úshinshi raketkasy, rýmynııalyq Sımona Halepten eki ret óte almasa, bıyl reıtıngte ekinshi oryndaǵy reseılik Marııa Sharapovadan da jeńildi. Degenmen bıyl álemniń úzdik on tennısshisiniń qataryna kiretin germanııalyq Andrea Petkovıchti utty.
Aıta keteıik, Serena Ýılms Indıan-Ýells týrnırinde 2001 jylǵy jarysta óziniń jáne apasy Vınýstyń atyna aıtylǵan násilshildik jáne «jartylaı fınalda kelisip, biri ekinshisine jol berdi» degen aıyptaý sózderge baılanysty sodan beri bul jarystan bas tartyp kelgen bolatyn. Bıyl qaıta oralǵan ol - chempıondyqtan basty úmitkerlerdiń biri.
