Tennıs: Z.Dııas álemniń 19-ynshy raketkasy S.Lısıtskıdi bet qaratpaı utty
ASTANA. QazAqparat - Shtýtgart qalasynda tennısten ótip jatqan iri halyqaralyq týrnırdiń birinshi aınalymynda Qazaqstannyń birinshi, álemniń 32-inshi raketkasy Zarına Dııas germanııalyq, dúnıejúzilik satyda 19-ynshy orynda turǵan Sabına Lısıtskıdi bet qaratpaı utty.
Chempıonat.kom saıtynan alynǵan málimetke qaraǵanda, Zarına Sabınaǵa birde-bir geım bermeı, 6:0, 6:0 esebimen tize búktirdi. 21 jasar qazaq tennısshisi 9 breık-poınttyń altaýyn sátti paıdalana bildi.
Z.Dııas shırek fınalǵa shyǵý úshin ıtalıandyq, álemniń 15-inshi raketkasy Sara Erranımen kúsh synasady. Ol birinshi aınalymda polıak qyzy, dúnıejúzilik reıtıngte 9-ynshy orynda turǵan Agneshka Radvanskany jeńip ketti.
Aıta keteıik, júlde qory 731 myń AQSh dollaryn quraıtyn Shtýtgart týrnırine álemniń birinshi raketkasy, amerıkandyq Serena Ýılıamstan basqa myqtylardyń bári derlik qatysýda. Sonyń ishinde buǵan deıin osy jarystyń qatarynan úsh márte chempıony atanǵan reseılik, reıtıngte ekinshi oryndaǵy Marııa Sharapova bıyl da sol bıikten kórinýdi maqsat etip otyr.
