Tennıs: Z.Dııas A.Kerberdiń ózin sastyrdy
ORAL. QazAqparat - Qytaıdyń Ýhan qalasynda tennısten ótip jatqan iri halyqaralyq týrnırdiń ekinshi aınalymynda qazaqstandyq Zarına Dııas búgin nemis qyzy Anjelıka Kerbermen kezdesti.
Zarına dúnıejúzilik reıtıngte 40-ynshy orynda kele jatsa, Anjelıka osy týrnırdiń jetinshi, álemniń segizinshi raketkasy bolatyn. Soǵan qaramastan, Z.Dııas birinshi partııada 6:4 esebimen jeńiske jetti. Ekinshi set 6:2 esebimen A.Kerberdiń paıdasyna sheshildi. Úshinshi, sheshýshi partııada Zarına 4:2 esebimen alda turǵanymen, osy basymdylyqty saqtap tura almady. Sóıtip 6:4 esebimen (jalpy esep 2:1) nemis qyzy utyp ketti. Ol úshinshi aınalymda chehııalyq Barbora Zaglavova-Strytsovamen sheberlik baıqasady.
Aıta keteıik, búgin álemniń birinshi raketkasy, amerıkandyq Serena Ýılıams frantsııalyq Alıze Kornemen matchyn jalǵastyra almaı, jarys jolynan shyǵyp qaldy.
