Tennıs: Voskoboeva juptyq synda Nottıngem týrnıriniń shırek fınalyna shyqty
ASTANA. QazAqparat - Qazaqstandyq Galına Voskoboeva juptyq synda Nottıngem (Ulybrıtanııa) týrnıriniń shırek fınalyna shyqty, dep habarlaıdy QazAqparat tilshisi.
Ol reseılik tennısshi Natela Dzalamıdzemen birge alǵashqy kezdesýin sátti ótkizdi.
Qazaqstandyq-reseılik jup avstralııalyq Arına Rodıonova men Ýkraına eliniń ókili Olga Savchýkti 7:5, 6:1 esebimen utty. Kezdesý 1 saǵat 5 mınýtqa sozyldy.
Voskoboeva men Dzalamıdze jartylaı fınalǵa shyǵý úshin juptyq synda úshinshi raketka bolyp tirkelgen polıak qyzy Alıtsııa Rosolska jáne amerıkalyq Ebıgeıl Spırspen kúsh synasady.
Eske sala keteıik, keshe Nottıngem týrnırinde jekeleı synda Qazaqstannyń birinshi, álemniń 45-inshi raketkasy Zarına Dııastyń oıyn ústinde jaraqat alyp, jarys jolynan shyǵyp qalǵanyn jazǵan bolatynbyz. Zarına sonymen qatar qytaılyq Chjen Saısaımen birge juptyq básekege de túsip, bastapqy kezdesýinde ulybrıtanııalyq Iohanna Konta men belgııalyq ıAnına Vıkmaıerdi utyp, olar da shırek fınalǵa shyqqan edi.
