Tennıs: Voskoboeva juptyq synda Madrıd týrnıriniń shırek fınalyna shyqty
NUR-SULTAN. QazAqparat - Qazaqstandyq tennısshi Galına Voskoboeva reseılik Veronıka Kýdermetovamen birge Madrıd týrnıriniń shırek fınalyna shyqty, dep habarlaıdy QazAqparat tilshisi.
Qazaqstandyq-reseılik jup ekinshi aınalymda osy týrnırdiń ekinshi raketkasy bolyp tirkelgen amerıkalyq Nıkol Melıchar men chehııalyq Kveta Peshkemen kezdesti.
Bir saǵattan astam ýaqytqa sozylǵan básekede Voskoboeva men Kýdermetova 6:2, 6:4 esebimen jeńiske jetti.
Olar budan buryn dál sondaı eseppen alǵashqy aınalymda taǵy bir amerıkalyq Rakel Atavo men slovenııalyq Katarına Srebotnıkten basym túsken bolatyn.
Endi G.Voskoboeva men V.Kýdermetova jartylaı fınalǵa shyǵý úshin osy týrnırdiń 8-raketkasy bolyp tirkelgen germanııalyq Anna-Lena Grenefeld pen Nıderlandy eliniń Demı Shıýrspen talasady.
Qazaqstannyń birinshi, álemniń 43-raketkasy ıÝlııa Pýtıntseva, ókinishke qaraı, jekeleı synda shırek fınalǵa shyǵa almady.
Ol úshinshi aınalymda álemniń 9-raketkasy, aýstralııalyq Eshlı Bartımen kúsh synasty.
Matchty sátti bastaǵan qazaqstandyq tennısshi birinshi partııany 6:4 esebimen utty.
Ekinshi partııada E.Bartı 6:1 esebimen ese qaıyrdy.
Úshinshi, sheshýshi partııada aýstralııalyq tennısshi qos birdeı breık jasap, kezdesýdi óz paıdasyna sheshti - 6:2.
Tartysty báseke eki saǵattan astam ýaqytqa sozyldy.
E.Bartı shırek fınalda álemniń 3-raketkasy, rýmynııalyq Sımona Haleppen sheberlik baıqasady.
Eske sala keteıik, budan buryn ıÝlııa Pýtıntsevanyń Madrıd týrnırin jeńispen bastap, úshinshi aınalymǵa shyqqanyn jazǵan bolatynbyz.
Taǵy bir qazaqstandyq Zarına Dııas Japonııadaǵy Gıfý ITF jarysynyń jeńimpazy atanyp, úzdik 100 tennısshiniń qataryna endi. Búgin ol Kúnshyǵys elindegi taǵy bir týrnırdi sátti bastady.
Erler arasynda Andreı Golýbev pen Tımofeı Skatov, sodan keıin AQSh-taǵy jarystan jeńimpaz bolyp kelgen Dmıtrıı Popko Shymkent týrnırin sátti bastady. Bul jarysta Qazaqstannan Aleksandr Nedovesov pen Dmıtrıı Popko ǵana úshinshi aınalymǵa shyqty.
