Tennıs: Voskoboeva juptyq synda Madrıd týrnıriniń fınalyna shyǵa almady
NUR-SULTAN. QazAqparat - Qazaqstandyq tennısshi Galına Voskoboeva reseılik Veronıka Kýdermetovamen birge juptyq synda Madrıd týrnıriniń fınalyna shyǵa almady, dep habarlaıdy QazAqparat tilshisi.
Qazaqstandyq-reseılik jup jartylaı fınalda osy týrnırdiń besinshi raketkalary, taıbeılik Se Shýveı men chehııalyq Barbora Strytsovamen kúsh synasty.
Birinshi partııada S.Shýveı men B.Strytsova 6:4 esebimen utsa, ekinshisinde G.Voskoboeva men V.Kýdermetova dál sondaı eseppen ese qaıyrdy. Sodan keıin taıbeılik-chehııalyq jup basym tústi - 10:7.
Qarsylastar tórt-tórtten breık jasaǵan báseke 1 saǵat 29 mınýtqa sozyldy.
S.Shýveı men B.Strytsova fınalda osy týrnırdiń altynshy raketkalary, kanadalyq Gabrıela Dabrovskı jáne qytaılyq Sıýı Ifanmen bas júlde úshin talasady.
Eske sala keteıik, budan buryn Galına Voskoboevanyń juptyq synda Madrıd týrnıriniń jartylaı fınalyna shyqqanyn jazǵan bolatynbyz.
Sondaı-aq Zarına Dııas Japonııadaǵy Fýkýoka, Dmıtrıı Popko men Aleksandr Nedovesov Qazaqstandaǵy Shymkent týrnıriniń jartylaı fınalyna joldama aldy.
