Tennıs: Voskoboeva juptyq synda Lýgano týrnıriniń fınalyna shyqty
NUR-SULTAN. QazAqparat - Qazaqstandyq tennısshi Galına Voskoboeva reseılik Veronıka Kýdermetovamen birge Lýgano (Shveıtsarııa) týrnıriniń fınalyna shyqty, dep habarlaıdy QazAqparat tilshisi.
Voskoboeva men Kýdermetova juptyq synda osy týrnırdiń 1-raketkasy bolyp tirkelgen edi. Olardyń jartylaı fınaldaǵy qarsylastary, jarystyń 4-raketkasy, shveıtsarııalyq Belında Benchıch pen slovakııalyq Vıktorııa Kýzmova da osal emes-ti.
Bıyl 35-ke tolatyn G.Voskoboeva sońǵy jyldary juptyq básekede ǵana óner kórsetip júrse, 21 jasar V.Kýdermetova jekeleı synda da osy Lýgano týrnıriniń shırek fınalyna deıin jetti.
Birinshi partııada breık jasaǵan G.Voskoboeva men V.Kýdermetova alǵa shyqty - 4:3. Sodan keıin taǵy bir breıkpen bitirdi - 6:3.
Ekinshi sette qazaqstandyq-reseılik jup 4:2 esebimen taǵy da alǵa ketti. Alaıda B.Benchıch pen V.Kýzmova qaıyra breık jasap, sosyn tarazy basyn teńestirip qana qoımaı, alǵa shyqty - 5:4. Degenmen Voskoboeva men Kýdermetova eki geımdi qatar óz esepterine jazdy - 6:5. Aqyry bul partııa taı-breıkke ulasty. Munda qazaqstandyq-reseılik jup basym tústi - 7:5.
Báseke 1 saǵat 33 mınýtqa sozyldy.
G.Voskoboeva men V.Kýdermetova fınalda osy týrnırdiń 3-raketkasy, rýmynııalyqtar Sorana-Mıhaela Kyrstıa men Krıstına-Andrea Mıtýmen chempıondyq ataqty sarapqa salady.
Eske sala keteıik, budan buryn G.Voskoboeva men V.Kýdermetovanyń Lýgano týrnıriniń jartylaı fınalyna shyqqanyn jazǵan bolatynbyz. Erler arasynda Qazaqstannyń birinshi, álemniń 44-raketkasy Mıhaıl Kýkýshkınniń Monte-Karlo týrnırindegi qarsylasy belgili boldy.
