Tennıs: Ýımbldondaǵy match 6 saǵat 36 mınýtqa sozyldy

Kezdesý 6 saǵat 36 mınýtqa sozylyp, onda álemniń 8-raketkasy K.Anderson ózinen eki-aq saty tómen turǵan D.Isnerdi 7:6 (8:6), 6:7 (5:7), 6:7 (9:11), 6:4, 26:24 esebimen jeńdi.

Ýımbldonda sońǵy partııada taı-breık oınalmaıtyny belgili. Sondyqtan tennısshilerdiń bireýi breık jasap, óziniń geımin alǵansha, oıyn jalǵasa beredi. Esep 24:24 bolyp turǵan mezette D.Isner qarsylasynyń breık jasaýyna múmkindik berip qoıdy. K.Anderson sosyn óziniń geımin jeńispen aıaqtady.

Osylaısha bul match uzaqtyǵy jóninen Ýımbldon tarıhyndaǵy ekinshi kezdesý bolyp tirkeldi. 2010 jyly Ýımbldon týrnıriniń alǵashqy aınalymynda osy D.Isner men frantsýz Nıkolıa Maıý aıdy aspanǵa shyǵaryp, úsh kún boıy bir-birine jeńistik bermegen edi. Onda 11 saǵat 5 mınýtqa sozylǵan básekede D.Isner sońǵy partııada 70:68 esebimen jeńiske jetken edi. Keıin tennıs tarıhynda eń uzaq kezdesý bolǵan tarıhı match ótken 18-inshi kort qabyrǵasynda eskertkish taqta ornatyldy.

Bul joly Anderson men Isner arasyndaǵy jekpe-jek 11 saǵatqa jete almaǵanymen, sheshýshi básekelerde (jartylaı fınal men fınal) oınalǵan geımder sany jóninen burynǵy nátıjeden asyp tústi. ıAǵnı, 2009 jylǵy Ýımbldon týrnıriniń fınalynda shveıtsarııalyq Rodjer Federer men amerıkalyq Endı Roddık 77 geımmen toqtasa, Anderson men Isner 99-ǵa bir-aq jetkizdi.

Sonymen qatar D.Isner Ýımbldon týrnırlerindegi eıs sany jóninen rekordtyq nátıje kórsetti. Buǵan deıin horvatııalyq Goran Ivanıshevıch 2001 jylǵy Ýımbldon týrnırinde 212 eıs jasasa, Isner bul kórsetkishten asyp tústi.

Aıta keteıik, K.Anderson Ýımbldon týrnıriniń fınalynda dúnıejúzilik reıtıngte kósh bastap turǵan ıspanııalyq Rafael Nadal nemese osy jarystyń 12-inshi raketkasy bolyp tirkelgen serbııalyq Novak Djokovıchtiń bireýimen sheberlik baıqasady.

Ýımbldonǵa erler arasynda Qazaqstannan jalǵyz qatysqan Mıhaıl Kýkýshkın ekinshi aınalymda R.Nadalǵa jol bergen bolatyn.