Tennıs: Tımofeı Skatov Portýgalııadaǵy týrnırdi jeńispen bastady
NUR-SULTAN. QazAqparat – Qazaqstandyq, álemniń 193-raketkasy Tımofeı Skatov Portýgalııadaǵy Oeırash chellendjer týrnırin jeńispen bastady, dep habarlaıdy QazAqparat tilshisi.
Qazaqstandyq tennısshi alǵashqy aınalymda dúnıejúzilik reıtıngte 493-orynda turǵan portýgalııalyq Tıago Kakaomen kortqa shyqty.
T.Skatov saǵat jarymnan astam ýaqytqa sozylǵan matchta 6:2, 6:1 esebimen jeńiske jetti. Ol 8 breık-poınttyń altaýyn paıdalana bildi. Qarsylasy 1 breıkten (11 breık-poınt) asa almady.
Tımofeı Skatov ekinshi aınalymda álemniń 116-raketkasy, brazılııalyq Tıago Monteıro nemese reıtıngte 185-satydaǵy ıtalııalyq Djanmarko Moronıdyń bireýimen kezdesedi.
Taǵy bir qazaqstandyq Denıs Evseev Lýgano (Shveıtsarııa) chellendjer týrnıri irikteý saıystarynyń fınalynda bosnııalyq Aldan Setkıchke 3:6, 2:6 esebimen ese jiberip, negizgi jarysqa qosyla almady.
Eske sala keteıik, budan buryn Elena Rybakınanyń da Maıamı týrnıriniń tórtinshi aınalymyna shyǵa almaǵanyn, Úndistanda jasóspirimder arasynda álem chempıonatynyń irikteý kezeńi ótetinin jazǵan bolatynbyz.
